Boeke-Insig is vanjaar die eerste keer deel van die Suidoosterfees wat
van 27 Januarie tot 1 Februarie 2009 in Kaapstad aangebied word. Ons bied ’n spesiale program aan waarin topskrywers soos Johan Bakkes, Dana Snyman en Gert Vlok Nel oor hul boeke gaan gesels. Dié lekker samekoms vind plaas op Sondag 1 Februarie van 12:30 tot 14:30.
Daar is ’n hele paar ander boekverwante aanbiedinge op die fees om na uit te sien. In Boeke-ontbyt met Annelie Botes (Saterdag 31 Januarie om 09:00) gesels die uitgewer Riana Barnard met dié gewilde skrywer oor haar nuwe roman, Thula-thula, wat binnekort by Tafelberg verskyn.
Dirk Nagtegaal beskryf homself as “’n lekkerbek wat die lewe met sy tong beproef”, en in Kok en Skinker – Boekbekendstelling & Kookshow (30 Januarie om 18:30) kan feesgangers dit eerstehands ervaar.
Die Trantraal-broers van Stormkaap-faam gaan gesels met Kabous Meiring en bekendes uit die comics-wêreld in Jeugboekspreking: Drome kom altyd andersom uit (30 Januarie om 10:00).
In Ligdans / Towards the Light (31 Januarie om 17:30, Wordwise-kinderteater) gesels die skrywer Jeanne Els met onder andere Fahiem Stellenboom en Vuyelwa Booi oor depressie. Besoek www.suidoosterfees.co.za vir meer inligting.
lees meer
|
